········Lehenengo arratsaldea ······· 

16:00 Hortxata bat Explanadan 

La Taberna del Gourmeteko sukaldaritza dastatu ondoren ez dago itsas ertzean paseo freskagarri bat ematea bezalakorik. 

Ezkerrera hartuko dugu San Nicolas kaletik eta Explanada de Españaren hasierara iritsiko gara, bere mosaikoagatik  ezaguna den tokira. Itsasoko olatuak imitatzen dituzten marmol gorri, krema eta beltzeko sei milioi tesela baino gehiago ditu. Gure atzean Carbonell etxea daukagu. Fatxada modernista duen eraikin dotorea, eta bere kondaira duena: dirudienez, Enrique Carbonell enpresari Alcoidarrak Alacantera joan behar izan zuen bizitzera bere alabaren gaixotasuna zela eta. Beste garai batzuk ziren eta bidaia ez zen batera erraza. Hala, Palace hotelean agertu zen itxura zikin eta zarpailarekin eta ez zioten ostatu hartzen utzi. Haserre, hotela baino eraikin handiagoa eta dotoreagoa egingo zuela erabaki zuen. Carbonell etxea 1925ean bukatu zuten. 

Freskagarriren bat hartzeko gogoz gelditu bagara, onena Peret kioskora joatea da. Beti beteta dago baina merezi du pixka bat itxarotea bertako izozki eta hortxatak dastatu ahal izateko. Hiriko onenak direla diote. 

18:00 Alacantek badu bere ranbla 

Gauden tokitik 200 metro baino gutxiagora, Mendez Nuñez ranbla dago, alde zaharraren eta hiriaren zati berriaren arteko muga; Isabel II.a erreginak harresia botatzeko baimena eman ondoren egin zena. 

18:30 Konkatedralera bisita 

Ranblatik jarraituko dugu eta hamar minutura Miguel Soler kalearen bidegurutzera iritsiko gara. Jarraitzen badugu, 50 metrora Abad Penalva plaza txikira iritsiko gara. Gure aurrean San Nicolás de Bari konkatedralaren fatxada aurkituko dugu; kultu ordutegien arabera bisita daitekeena. Bisita egin aurretik galdetzea komeni da. 

Alacantarrak oso harro daude konkatedralaz. Estilo herrerianoko fatxadak (XVII. mendea) arreta erakartzen du, baita auzoan zein ondo integratuta dagoen ere. Ez dago kanpoaldeko plaza asko, dena hurbilagoa dela dirudi. Barrualdean, soiltasuna apainketa dotore bihurtzen da, erdiko habeartea 45 metroko altuerako kupula batek koroatzen duelarik. Bere artelanik preziatuenen artean daude Erremedioaren Ama Birjinaren irudia, Arimen erretaula, Komunioiren kapera eta Buena Muerte Kristoaren gurutzea. 

20:00 Ibilbidea auzoan barrena 

Irtetean, Labradores kalea hartuko dugu, eta Santa Cruz auzoaren bihotzera eramango gaitu. Alacanten norbaitek Auzoaz hitz egiten duenean, denek dakite Santa Cruz auzoaz ari dela. 150 metro aurrerago, Virgen de Belen kalean eskuinera hartuko dugu eta Abad Najera kalera iritsi arte jarraituko dugu. Azkenik, bost bat minutuz jarraituko dugu Carmen plazara arte; hor hasten da gaztelurako igoera. 

21:00 Afaria, ikusmira ederrarekin 

Ordu hauetan itxita egon arren, Santa Cruz ermitara hurbil gaitezke. Puntu horretatik abiatzen da Aste Santuko prozesiorik hunkigarrienetako bat: Asteazken santuetako Santa Cruz ermandadearena. Ikusgarria da kostaleroek kale estu eta aldapatsuetan barrena pasoa nola eramaten duten ikustea. 

Gazteluaren magaleko La Ereta jatetxera 300 metroko igoera baten ondoren iritsiko gara. Ezin ditugu probatu gabe utzi arrozak eta postreak, ezta hiriko ikusmira ederra ere, bereziki gauez. 

Hirigunera itzultzean, zonalde zaratatsu honetako tabernetako batean geldituko gara. Hiru hauek aukera onak dira: Red Lion pub-a (San Isidro, 6), Callejón taberna (plaza de Quijano, 6) eta Desafinado House Cluba (Santo Tomás, 6).

Bigarren goiza 

10:00 Tranbiaz hirian barrena 

Egun berria Alacanteko Aldundiaren jauregian hasiko dugu. Aurrera jarraituko dugu Avenida de la Estaciónetik  plaza de los Lucerosera iritsi arte. TRAMera igotzeko garaia da, Alacant hiriko tren moderno eta eraginkorrera, alegia. Gure helmugan jaitsiko gara: Arkeologiako Museo Probintzialean (MARQ). 

10:30 MARQ, prestigioa duen museoa 

2004. urtean Europako urteko museoa izendatu zuten MARQ (asteartetik larunbatera 10:00etatik 19:00etara irekita, eta igande eta jai egunetan 10:00etatik 14:00etara, udako ordutegia kontsultatu)  asentamendu ibero eta erromatarren garaitik zonaldeko aberastasun arkeologikoaren isla da. Museoak beste erakundeetatik datozen erakusketak aurkezten ditu, hala nola Museo Britanikotik edo San Petersburgoko Hermitagetik. 

12:00 Beste Gernika 

Bisita bukatuta, TRAMean itzuliko gara. Hurrengo geltokia azoka izango da, Mercado Centralen (astelehenetik larunbatera irekita, 7:30etik 14:30era). XX. mendearen hasieran eraiki zuen Juan Vidal Ramos arkitektoak, Guda Zibilean bonbardatu egin zuten. Gaur egun, itxura modernista berreskuratu du eta Alacanteko bizitzaren ikurra da. 

13:00 Suaren festa 

Abastos plaza atzean utzi eta Alfonso X etorbidearen ezkerretik jarraituko dugu eta eskuinera hartuko dugu Mendez Nuñez ranblatik. Hamar bat minutuz ibiliko gara, eta 29. zenbakian ikusiko dugu Suaren museoa (asteartetik larunbatera irekita, 10:00etatik 14:00etara eta 17:00etatik 20:00etara, udan 18:00etatik 21:00etara). Barrualdean, Alacanteko ohitura garrantzitsuenetako baten historia jasotzen da: San Juan sua, Interes Turistiko Nazional izendatutako festa. 

14:00 Alacanteko klasiko batekin hitzordua 

Bazkaltzeko ordua da eta 500 metro eskasera bertako gastronomiaren erreferente bat daukagu:  Nou Manolín jatetxea. Repsol eguzki bat du, eta bertako platerak, hala nola baratxuri zuria ganba gorrien tartarekin edo turroi torrada txufa zoparekin, benetako plazera dira. 

Autoa hartzea axola ez bazaigu, bazkaltzeko beste alternatiba bat daukagu: Aire TapasBar ezagutzea, Quique Dacosta chefaren espazio gastronomiko berria. 20 minutura dago, El Altet aireportuko terminal berrian. Merezi du hara joatea bere sukaldaritza dastatzeko.

Bigarren arratsaldea 

16:00 Bazkalostekoa ensantxean 

Bazkal ondoren, Bailen kalera atzera egingo dugu Ruperto Chapi plazaraino. Bertan dago Antzoki Nagusia. 1847an eraiki zen, hiriko merkatari garrantzitsuenek eskatuta. 1896an, adibidez, jendaurreko lehen argazki saioa egin zen bertan. Antzokitik hurbil Ideal zinema dago, hogeigarren hamarkadakoa. 

Castaños kaletik 200 metro ibiliko gara, itsasorantz. Bat-batean, Gabriel Miro plazak duen hosto kopuru handiak harrituko gaitu (alacantarren leku maitatuenetako bat, bero egiten duen orduetan itzalpean paseo bat emateko bikaina). Historian zehar, plaza honek hainbat izen izan ditu: de las Barcas (honaino iristen zen hondartza), de Isabel II eta de Correos (zerbitzu hau ematen zuen eraikin zaharragatik, gaur egun utzita dago). Plazaren erdian, Iturri ikusgarri bat dago Vicente Bañulsen eskultura multzoarekin. 

17:30 Lehen lerrorako itzulera 

Berriz ere Explanada paseora aterako gara, Real Liceo Casino de Alicante eraikina dagoen izkinatik. Jarraian, eskuinera hartu eta Canalejas parkera abiatuko gara, 500 bat metrora. 

Harresiek utzitako hutsunea hartzen du parkeak. Lehenengo portutik ateratzen zen merkantzia biltzeko tokia izan zen, hala nola ardo kupelak, eta bere tren geltokia izatera ere iritsi zen. Gero, langileen bilgune bihurtu zen parkea, bereziki udan. Antzerkia egiten zen eta bertako ficus handiek itzala ematen zuten. Itzal hori gaur egun ere badago, baita 1916ko Canalejasen monumentua ere. 

Parkearen bukaeran Arrain lonjaren udal erakusketa aretoa dago. 1992. urteaz geroztik, arabiar ukituak dituen eraikin modernistan dago galeria, garai batean portuko arrain merkatu zaharra zegoen tokian. 

18:30 Shopping 

Erakusketa aretoaren parean, 400 metrora, Panoramis merkataritza gune animatua ikusiko dugu, Marina de Poniente delakoan, falta zaizkigun azken erosketak egiteko leku aproposa. Urteko egun guztietan dago irekita, eta haurrentzako tailerrak, kontzertuak eta ikuskizunak aurkituko ditugu bertan. Eskaintza komertziala ere oso zabala da: teknologia, bitxigintza eta artisautza, arropa, liburuak, etab. 

Gero iparraldera itzultzeko garaia iritsiko da, Puerta del Mar plazara; kilometro bat inguruko paseo atsegina. Geldialdia egin eta Peret kioskoan hortxata har dezakegu berriz ere, edo Postiguet hondartzan bainua hartzen ari den jendeari ere begira egon gaitezke. Hori guztia ilunabar magikoa ikusteko prestatu aurretik. Esaten dutenez, Espainiako ilunabarrik onenak ikus daitezke Alacanten. 

20:30 Paella, kopak eta zorte on 

Afaltzeko, ezingo dugu pasa Dársena jatetxe ezaguneko arroza probatu gabe. Levante kaitik 500 bat metrora dago jatetxea, Puerta del Marren parez pare. Aurten 50 urte betetzen ditu eta kontu handiz prestatu duen kartak ospe handia du nazioartean. 

Gero, gauarekin jarraitzeko, Levante portuaren zonaldean dauden pubetara joan gaitezke, edo zortea proba dezakegu Kasino berriko mahaietan. Nork daki, Costa Blancako hiriburura egindako bisita borobildu dezakegu.