Natureza e arte con maiúsculas xúntanse nas terras de Bizkaia, onde se encontra a localidade de Gernika, vila histórica e simbólica dos vascos dende o famoso bombardeo da Guerra Civil, inmortalizado por Picasso nun dos seus lenzos. Nas proximidades, tamén coñeceremos Urdaibai, un dos humidais mellor conservados de toda Europa, onde tamén encontraremos escusas para gozar da arte.

Visitas con historia na cidade de Gernika 

A nosa visita a Gernika comeza na Casa de Xuntas e a Árbore de Gernika. Baixo esta, reuníanse os representantes das Xuntas Xerais de Bizkaia e era onde o rei de Castela xuraba respectar os foros setentrionais. Hoxe a árbore orixinal, que sobreviviu ao bombardeo da cidade, gárdase baixo un quiosco. Ao lado, encóntrase o edificio da Casa de Xuntas, que data de 1826 e no que se realizan numerosos actos protocolarios do goberno vasco.

Paseos de arte e deporte tradicional pola cidade 

Aínda en Gernika, e a uns pasos da Casa de Xuntas, está o parque de Los Pueblos de Europa, un céntrico xardín arborado con estanques e sendeiros onde se levantan esculturas de Eduardo Chillida e de Henry Moore. As máis famosas son Gure aitaren etxea e Large Figure in a Shelter. O parque acolle tamén o busto do viaxeiro e escritor Alexander von Humboldt. A uns pasos, destaca a igrexa gótica de Santa María, co seu espléndido órgano Walcker de 1889. Hai que camiñar un pouco máis para ver o frontón Jai Alai, obra arquitectónica de Secundino Zuazo e meca dos afeccionados ao deporte da cesta-punta, tan popular no País Vasco.

Un bosque sacado dun conto de fadas 

Dende a estrada que une Gernika e Arteaga, tomando a desviación ás covas de Santimamiñe e pasando polo casarío Lezica, chégase ao Bosque de Oma. Alí, en plena reserva de Urdaibai, o artista Agustín Ibarrola pintou e esculpiu sobre os piñeiros distintas figuras, creando unha obra que poboa o bosque de habitantes máxicos. O dramaturgo Pedro Villora situou nese lugar a acción da súa traxedia Electra en Oma.

Paraíso das aves migratorias xunto ao mar 

E xa que estamos tan preto, paga a pena que nos acheguemos á entrada da reserva da biosfera de Urdaibai. A área é unha ZEPA (zona de especial protección para as aves), polo que é moi apreciada polos ornitólogos. Este espazo protexido engloba unha área de 200 km² e abrangue 22 municipios de costa e de interior, paisaxes magníficas de vales e zonas de montaña media. Encontraremos a posibilidade, ademais, de realizar diversas actividades deportivas de natureza. Por outra parte, nun terreo do centro da reserva, chamada Sukarrieta, proxectouse construír unha ampliación do museo Guggenheim de Bilbao.

Praias para o recordo na veciñanza da reserva 

Un pouco máis lonxe de Urdaibai, xunto o cabo de Ogoño e no municipio de Ibarrangelu, a praia dunar de Laga encerra un dos areais máis bonitos da costa de Bizkaia. Os seus case seiscentos metros de area fina dispoñen de todos os servizos e nas súas augas poden practicarse deportes acuáticos como o surf. Ás veces, dende a praia é posíbel ver como os máis atrevidos saltan dende a próxima pena de Ogoño cos seus parapentes.

Suxestión gastronómica 

O bo comer do País Vasco é un tópico que, non por selo, deixa de ser verdade. No caso de Gernika, hai que prestar especial atención ás fabas locais, de sabor excepcional. O txakolí, un viño de uva verde con alto grao de acidez, tampouco faltará nas mesas biscaíñas, como pode ser a de Zallo Barri (Rúa Juan Calzada 79, tel.: 946 251 800). Outro local interesante é Remenetxe (Barrio Ugarte 5, tel.: 946 253 520), situado nun casarío restaurado en 1986. Dispón de viveiro propio e os peixes chegan cada día do porto de Bermeo. A súa adega conta con máis de seiscentas referencias.

Agradecementos: © Concello de Gernika-Lumo. Turismo de Euskadi.