Entre as gargantas do Xúquer e Huécar, a zona histórica de Cuenca é o centro de operacións da visita. Atractivos como as famosas Casas Colgadas, construídas en equilibrio sobre acantilados de vertixe ou a catedral, reclaman unha visita na que o reloxo non conta. 

Como curiosidade, hai que sinalar que a catedral se construíu en estilo gótico francés, xa que esta era a procedencia da esposa de Afonso VIII de Castela. Pero máis alá da arquitectura e a tradición, Cuenca reúne interesantes opcións culturais para relaxarse ou gozar en familia. Non en van é candidata á capitalidade cultural europea de 2016.

Unha arquitectura urbana moi peculiar   

As Casas Colgadas son un conxunto de tres edificios civís do s. XV. Restaurados en data recente e situados xunto á Fouce do Huécar, que deron fama mundial á cidade. Dende onde se ven mellor é da impoñente ponte de San Pablo, de 100 metros de lonxitude e realizada en ferro en 1902. Aos seus pés, encóntrase o parador, antigo convento dominicano dedicado ao mesmo santo. 

O claustro cubriuse cun teito de cristal e a capela é hoxe unha orixinal cafetaría para gozar en parella ou en familia. Tamén é especial o Museo de Arte Abstracta Española, unha das mellores coleccións de arte contemporánea do Estado que se exhibe nada menos que dentro dunha das Casas Colgadas. Destacan nel as obras de Millares ou Tàpies. Entre setembro e xuño, a Fundación Juan March organiza alí cursos de arte e conferencias. 

Unha cidade con historia cristiá, árabe e xudía 

Por detrás das Casas Colgadas, a visita á xudaría de Cuenca comeza na praza Maior e segue ata a antepraza, onde empezaba o desaparecido alcázar árabe. En cambio, hoxe achamos aquí o Convento das Brancas. As escaleiras que hai a un lado levan á praza da Mercede, antiga sede dos mercedarios calzados, que reúne lugares de interese como a igrexa e o convento deste nome . A rúa Zapaterías ata alcanzar a de Alfonso VIII e a de Santa Catalina, pechan o paseo. Ao lado, na igrexa da Santa Cruz, hai unha exposición permanente de artesanía da zona.

Un museo científico no núcleo antigo 

Nun conxunto de edificios do século XVIII e XIX, asentados sobre restos medievais e moi preto da xudaría, o Museo das Ciencias de Castela-A Mancha achéganos aos misterios do cosmos. O seu planetario constitúe unha visita inevitable se viaxamos en familia. Algunhas das actividades do museo, como o recente Congreso Internacional de Reloxos de Sol, deixaron pegada na cidade. Este é o caso do reloxo da praza Taiyo, construído expresamente para a ocasión. Cunha agulla de 6,72 metros e unha superficie de máis de setecentos metros cadrados, é o máis grande do mundo.

Pano de fondo para un conto de fadas 

A dezasete quilómetros de Cuenca, en Valdecabras, a Cidade Encantada é unha excursión complementaria inevitábel. Sitio Natural de Interese Nacional, en plena serra conquense, esta "cidade" está formada por un conxunto de rochosas calcáreas erosionadas durante miles de anos. A auga, o vento e o xeo esculpiron a rocha e crearon formas plásticas sorprendentes e espectaculares. Un percorrido guiado permite coñecer as diversas formacións, bautizadas con nomes de animais e obxectos, sendo o símbolo do lugar o Torno Alto.

Suxestións gastronómicas 

O "ajoarriero" e o "morteruelo" son dous dos pratos tradicionais da cociña conquense. O primeiro prepárase con améndoas e allo, mentres que o segundo é un guiso que leva fígado de porco, especias e pan relado, machucados co morteiro. Estes pratos e outros elaborados con cangrexo de río poderémolos encontrar en restaurantes tan renomeados como o Mesón Casas Colgadas (Recomendado pola Guía Repsol) (Canónigos s/n, teléfono: 969 223 509), instalado dentro dun dos famosos edificios, ou o Figón del Huécar (Ronda Julián Romero 6. Teléfono: 969 240 062), galardoado cun Sol Repsol, na que foi a casa do cantante José Luis Perales.

  
Agradecementos: Instituto de Promoción Turística de Castela-A Mancha. Parador de Cuenca.