Esta é unha opción ideal para aqueles aos que lles guste gozar duns días de sol e mar, rodeados de servizos e comodidades. Puerto del Carmen encóntrase a apenas dez minutos en coche do aeroporto de Arrecife, por onde chega practicamente todo o turismo a Lanzarote. 

Praia Grande, como o seu nome indica, é a máis extensa de Puerto del Carmen. Conta con máis de seis quilómetros de litoral, apenas salpicado por algúns obstáculos rochosos. Polo tanto, aquí non hai ningunha dificultade para encontrar o mellor lugar e aproveitar a fondo as horas de acción do suave e relaxante sol invernal.

Ao igual que nas praias de Pocillos e Matagorda, a area de praia Grande é fina e dourada, algo que por estas zonas non é moi habitual. É unha praia urbana unida ao paseo marítimo, o que facilita o acceso tamén en casos de persoas con mobilidade reducida. Nos últimos anos, converteuse nunha das praias máis visitadas de toda a illa. 

Unha cidade activa e pensada para a familia

Pola noite, a principal actividade dos visitantes é pasear polas rúas do animado Puerto del Carmen e pescudar entre as súas tendas de roupa, artesanía e recordos tradicionais canarios. Esta zona de Lanzarote caracterízase por potenciar o turismo familiar. Os hoteis e os parques de ocio están pensados para que os nenos non se aburran. Unha das atraccións máis interesantes é o parque temático Rancho Texas Park, que conta cunha colección de animais norteamericanos (bisontes, pumas, etc.) e ofrece espectáculos de lazo vaqueiro ou actuacións de baile country.

Cetáceos en Puerto Calero 

Puerto Calero, ao sur de Puerto del Carmen, é unha zona de turismo de calidade. O edificio do antigo varadoiro, no porto deportivo, transformouse no Museo de Cetáceos de Canarias. É unha boa iniciativa para saber máis sobre a vida destes mamíferos dende un enfoque interactivo. Alí pódese facer o que nunca deixan nun museo: tocar ósos e dentes, mesmo barbas de balea, oír o son dos delfíns e apreciar as reproducións a tamaño real. Trátase dunha visita especialmente recomendábel para as familias.

No mesmo Puerto Calero está un dos mellores restaurantes de Lanzarote: Amura (1 Sol de Repsol (tel.: 928 513 181). Hai poucas cousas máis saborosas na illa que probar a súa terrina de foie con cherne afumado mentres se goza dunha ampla vista sobre os veleiros amarrados na mariña. En  La Cañada, en Puerto del Carmen (tel.: 928 510 415) a especialidade son as carnes á brasa.