O hotel Valdepalacios encóntrase no termo municipal de Torrico, na estrada de Oropesa a Puente del Arzobispo. Conta con 29 espazosos cuartos, o máis grande ten 80 metros cadrados. Todos están decorados de xeito diferente, pero cun estilo luxoso e romántico sen chegar a ser ostentoso.

Os cuartos do primeiro piso dan ás serras de Gredos e Guadalupe. Os do faiado, o que era o antigo faiado da casa, teñen pola súa altura unhas vistas igualmente inmellorábeis sobre a devesa. O resto dos cuartos teñen vistas ao lago, ao xardín ou ao patio. Ningún deles desmerece o conxunto, concibido como unha experiencia integral de máximo confort.

Restaurante Tierra, o principal centro de atención 

Para iso, ademais de poder hospedarse nun réxime de completa liberdade, os hóspedes poden contratar algúns dos paquetes que ofrece o hotel. Neles ofértase, para a estadía dunha a dúas noites, xantar ou ceas con menú gastronómico no restaurante Tierra, catas de viños, paseos a cabalo ou en coche de cabalos, pícnics e tratamentos de spa.

A estadía en Villapalacios xa pagaría a pena por poder sentarse á mesa de Tierra (tel.: 925 457 534, galardoado cun Sol de Repsol). A cociña está dirixida polo xefe de cociña Ismael Delgado, baixo a supervisión de Santi Santamaría, un dos mellores cociñeiros de España. Probar a alta cociña de vangarda nun ámbito sinxelo e agradábel supón unha experiencia estimulante para os padais máis esixentes.

Actividades para aproveitar a devesa 

A extensión da devesa na que se encontra Valdepalacios favorece especialmente as actividades ao aire libre, moitas delas organizadas e supervisadas polo persoal do hotel: entre outras, montar en bicicleta, recibir clases de iniciación á equitación, navegar en barca polo lago do terreo mentres se observan os parrulos e o ámbito ou, mesmo, atreverse a intentar pescar tencas nas súas augas. Outra boa opción consiste, sinxelamente, en pasear pola devesa á tardiña. Os máis afeccionados á natureza poderán gozar da diversidade da fauna da bisbarra: parrulos, perdices, coellos, gamos, cervos...

Os que desexen abandonar esta atmosfera de recollemento exclusivo durante horas teñen varios puntos de interese ao seu alcance. Organízanse visitas guiadas por outros puntos de interese da zona, como o castelo de Oropesa, as ruínas árabes de Ciudad de Vascos, o mosteiro de Guadalupe ou o val de El Jerte.

Outra opción para compartir unhas horas divertidas coa parella pode ser un partido de golf. Palomarejos Golf está en Talavera de la Reina, a 40 minutos do hotel. O campo de golf é de 18 buratos.